धर्मेन्द्र कुमार कुर्मी
कृष्णनगर/ जेठ २१
कृष्णनगर नगरपालिकाको उद्योग बाणिज्य संघको सभा हलमा अवधी संस्कृति संरक्षण कार्यक्रम सम्पन्न भएको छ । साथै स्थानीय कलाकारहरुको प्रस्तुति गरिएको थियो ।
कार्यक्रममा अहिरउवा नाच , कहरउवा नाच , धोवियाना नाच ,झर्रा नाच, विरहा , अल्हा , चनैनी विरहा लगायत अवधी भाषाको लोकगीत कला संस्कृतिलाई प्रस्तुत गरिएको थियो । कार्यक्रमको प्रमुख अतिथि कृष्णनगर नगरपालिका नगर प्रमुख रजत प्रताप शाह र कार्यक्रमको अध्यक्ष निरहु यादवले अवधीको पहिचान झल्कने गरी धोती, कुर्ता र गम्छा लगाएर कार्यक्रममा सहभागी भएका छन् ।
प्रमुख अतिथिलाई मञ्चमा बस्नको लागि खटियाको व्यवस्थापन रहेको थियो । कार्यक्रममा सहभागी भएका सम्पूर्णका लागि नास्तामा पुडी , सब्जी , गुलगुला , सोहारी र सोठौरा खुवाएर अवधी संस्कृतिको खाने परिकारलाई जोगाउने उद्देश्यले खुवाइएको छ ।
कृष्णनगर नगरपालिका नगर प्रमुख रजत प्रताप शाहको भनाई अनुसार- हाम्रो अवधी भाषाको छुट्टै इतिहास र पहिचान रहेको छ । अवधी भाषामा एक छुट्टै प्रकारको मिठास रहेको पाइन्छ । अवधी संस्कृतिको जन्म देखि मृत्यु सम्म छुट्टै संस्कृति रहेको छ । हाम्रो यस्तो संस्कृतिलाई हामी सबै मिलेर संरक्षण र जोगाउने जिम्मेवारी अनि दायित्व रहेको छ ।
उक्त कार्यक्रम अवध मिडिया जागरणको आयोजना, अवधी पत्रकार संघ कपिलवस्तुको समन्वय र कृष्णनगर नगरपालिका आर्थिकको सहयोगमा सम्पन्न भएको हो ।
